Sabtu, 9 April 2011

Politik Sarawak jauh manah: Taib

Bansa Iban udah ulih berunding kena nyaga bansa diri empu

KANOWIT: Kepala Menteri Sarawak Pehin Sri Abdul Taib Mahmud madahka politik menua Sarawak jauh manah ari menua bukai serata Malaysia.“Aku deka madah ngagai semua kita ke bisi datai, poli­tik menua kitai tu jauh manah ari menua Semenanjung. Enti dulu suba kitai agi jauh ting­gal ba belakang, tang diatu politik Sarawak manah agi ari sida,” pia ku iya madah maya pengerami Pemesai Be­gulai enggau Rayat ba Rumah Jelani Anak Daud, Nanga Lesih ditu, pagi ensanus.

Kenu ku iya, kemaya hari tu mayuh bansa Iban udah landik berunding ngambika ulih nyaga bansa diri empu.

Taib madah, kaban parti Barisan Nasional (BN) iya nya Parti Pesaka Bumi­putera Besatu (PBB), Parti Rayat Sarawak (PRS) enggau Parti Progresif Demokratik Sarawak (SPDP) kala napi penusah dulu suba tang tiap bengkah penanggul nya dipu­tar enggau jalai berenggat.

Ku iya, PRS diatu udah chukup beserakup enti dibandingka sebedau pen­gawa bepilih besai taun 2006 suba ti mandangka penyarut entara diri sama diri lalu belabuh ari nya chalun BN-PRS, Alexander Vincent alah ngelaban chalun ngenatika diri, Gabriel Adit.

“Pemenang Adit tu nadai mai reti ngagai rayat ke ngundi iya laban iya enda ulih mai pemansang ngagai menua tu.

“Tu balat ngasuh kita rayat ba N.43 Ngemah rugi,” pia ku iya nerangka.

Tang ba pengawa bepilih serak tu, ku Taib, pekara baka nya enda nyadi agi laban rayat Ngemah udah landik berunding milih rayat ketau nyadi pengari sida.

Ku iya, seiku chalun iya nya, Joseph Jawa ti didinga deka betanding ba DUN Ngemah mega udah ngalih deka ny­ukung Alexender ba pengawa bepilih ti deka datai tu.

Nya alai, iya berasai lantang amat ati meda Joseph tu sama bela enggai meda bansa Iban pambar laban enda nyadi enggau berebutka penuduk Ngemah.

“Kitai enggai bala diri empu belaya diri sama diri, enti sida belaya kitai ngerara ngambika tau jenuh. Tu baru disebut politik ke manah lalu asil iya pemansang deka diasaika belama,” pia ku iya nambahka baru.

Baka sebedau tu, Taib sekali agi mantaika pengingin iya deka badu nyadi KM laban umur ke majak tuai tang sebedau nya ku iya, iya deka meda semua bengkah atur pe­mansang menua tu dipejalaika enggau teratur.

Nya alai ku iya, iya deka nempa orang baru ngambika sida tu tau nyadika ganti lalu nyadi pemesai ti dipebasa jemah ila.

Maya tu mega Taib bisi ngerahka bantu RM100,000 ti nyadi tanda kenang iya ngagai bala ba Rumah Jelani.

Iya ngarapka bala ba ru­mah panjai tu ulih ngetanka ulah beserakup ngelawa pe­mansang ari baruh pegai BN.

Ngenang PKR enggau SNAP iya ke ngena chalun ari luar, ku Taib madah iya enda iran ati enti sema chalun ‘terebai’ tu tau teparuk ngagai lebak ke dalam.

Iya andal BN ulih ngetanka majoriti 2/3 maya pen­gawa bepilih serak tu laban penyukung BN enda tebiuh runding enggau jaku asut penyakal.

Iya mega nemu kebuah nama penyampau chalun enggau betanding serak tu manggai 200 iku tang nyaut baru tu mandangka Malaysia ngembuan politik ke manah.

“Makin mayuh chalun betanding mayuh agi ga undi pechah lalu tu tau bendar ngeruga sida penyakal.

“Mayuh agi pengundi ‘beati dua’ lalu suah agi raban tu milih chalun ke bukai,”pia ku iya madah ngagai pengarang berita.

Sebedau nya Datuk Gra­mong Juna bisi ngerah bantu RM32 juta kena bejadika pa­lan meresi ai ba Bukong/Jagoi lalu projek nya berengkah bulan Mei ti deka datai.